مومن حضرت علي عليه السلام جي نگاه ۾

Tuesday, January 16, 2018

مومن حضرت علي عليه السلام جي نگاه ۾

حضرت امام علي عه جن فرمائن ٿا ته:

مومن دنيا ۾ مسافر آهي بيدار دل آهي، خدا جي حدود جي رعايت ڪندو آهي ، علم جو خزانو آهي، عقل ڪامل هوندو آهي، قلب سالم ۽ غير متزلزل حلم رکندو آهي، کليل هٿ۽ عطا ڪرڻ وارو هوندو آهي انهي جي گهر جو دروازو احسان جي لاءِ کليل آهي انهي جي چپن تي زياده مسڪراهٽ رهندي آهي ليڪن انهي جي باطن ۾ هميشه غم رهندو آهي،

فڪر ڪرڻ وارو، گهٽ سمهڻ وارو، گهٽ کلڻ وارو، ۽ خوش طبيعت هوندو آهي، لالچ کي ڪڍي چڪو آهي ۽ هوس کي قتل ڪري چڪو آهي، دنيا سان قطع تعلق ۽ آخرت سان رشتو جڙيل آهي، مهمان نواز ۽ يتيم پرور هوندو آهي، ٻارن تي نوازش ۽ بزرگن جو احترام ڪندو آهي، سائل کي محروم ناهي ڪندو، بيمار جي عيادت ڪندو آهي، جنازه ۾ شريڪ ٿيندو آهي، حرمت قرآن کان واقف آهي، خدا سان راز و نياز ڪندو آهي، پنهنجي گناهن تي خود گرفت ڪندو آهي، امرباالمعروف ۽ نهي عن المنڪر ڪندو آهي، جيستائين بک ۽ پياس نه لڳيس ته کائيندو نه آهي ادب سان هلندو آهي ۽ ڪوشش سان ڳالهه ڪندو آهي ( ته ڪٿي خدا جي نافرماني نه ٿي وڃي) نرمي ۽ ادب سان نصيحت ڪندو آهي غير خدا کان خوف ناهي کائيندو ۽ انهي کان بغير ڪنهن کان اميد ناهي لڳائيندو، نماز ۾ سستي ناهي ڪندو، تڪبر ناهي ڪندو مال ۽ دولت تي ناز ناهي ڪندو، پنهنجن عيبن تي نظر رکندو آهي ۽ ٻين جي عيبن جو مطلب ناهي رکندو مومن جي اکين جي روشني نماز آهي ۽ انهي جي ڪمائي روزو آهي، ۽ انهي جي عادت نيڪ رستو آهي ۽ شڪر انهي جي برڪت جو سبب آهي ۽ عقل انهي جو رهبر ۽ تقويٰ انهي جو زاد راهه ۽ دنيا انهي جي ڪمائڻ واري جاءِ ۽ قبر انهي، جي منزل اول ۽ ڏينهن ۽ رات (عمر ) انهي جو سرمايو ۽ جنت انهي جي منزل وما وا ۽ قرآن انهي جو قبيلو ۽ محمد ﷺ انهي جا شفيع ۽ خداءِ عزوجل انهي جا محبوب آهن

” ڪتاب هديته الشيعه صفه 53“